የጌታ ስራ
Yegieta Sera
2004 · ትራክ 2 · 5:41 · አማርኛ
ቁጥር 1 · Verse 1
የቱ ተነግሮ የቱ ይተዋል
የጌታ ሥራ እጅጉን በዝቷል
ከየት አንስቼ ስንቱን ላስታውስ
በየማለዳ ሁልጊዜ አዲስ
ነግሮ ሊጨርስ ማነው የቻለ
ተዓምራቶቹን እያስተዋለ
የጌታን ክብር ታላቅነቱን
የፍቅሩን ብዛት ደግሞ ጥልቀቱን
ከመታወቅም ሁሉ ያለፈ
ከህሊናችን ሞልቶ የተረፈ
ነውና ታላቅ ሥራው ብዙ
ለዚህ ለጌታ ምሥጋናውን አብዙ
ይሄ ሁሉ ፍጥረት የሚያመሰግንህ
ይሄ ሁሉ ክብር ለአንተ የተገባ
ስለሆንክ ገዢ ብርቱና ገናና
አሁንም አሁንም ይብዛልህ ምሥጋና
ፍጥረታት በሙሉ በግዛትህ ናቸው
ስለዚህም በአንተ ብዙ ደስታ አላቸው
በራሳቸው ቋንቋ ይመሰክራሉ
የእግዚአብሔር ሥራ ፍጥረት ነን እያሉ ሃሌሉያ
አዝማች · Chorus
የለህም መሳይ (፫x) በምድር በሰማይ
የለህም እኩያ (፫x) ኦ ሃሌሉያ
ቁጥር 2 · Verse 2
በደማቅ ብርሃን እራስክን ሰውረህ
ከፍ ካሉት በላይ እጅግ ከፍ ብለህ
ድካምና ዝለት ሳያውቅህ እርጅና
ትናንትና ዛሬም ሁልጊዜ ገናና
ንጉሥ በንግሥናው አዋቂው በዕውቀቱ
ሊመስልህ ሲሞክር ሲጥር አይ ሰው ከንቱ
ነገር ግን ከአንተ ጋር ሁሉን ሲያስተያይ
ሁሉን ብሎ ያልፋል የለህም መሳይ ሃሌሉያ
አዝማች · Chorus
የለህም መሳይ (፫x) በምድር በሰማይ
የለህም እኩያ (፫x) ኦ ሃሌሉያ
ቁጥር 3 · Verse 3
እግዚአብሔር እንዲህ ይህን ይመስላል
ተብሎ በቃላት መች ይገለጻል
አንዲያ ልጁ በቀኙ ያለው
ተረከው እንጂ ሌላ ማን አየው
ሰማይ ተቀምጦ እግሮቹ ምድር
ታላቅነቱ እንዴት ይነገር
መግለጫ ቋንቋ ቢጠፋም ቃሉ
እንዲሁ ብቻ ተመሥገን በሉ
የቱ ተነግሮ የቱ ይተዋል
የጌታ ዝና እጅጉን በዝቷል
ከየት አንስቼ ስንቱን ላስታውስ
በየማለዳ ሁልጊዜ አዲስ
አዝማች · Chorus
የለህም መሳይ (፫x) በምድር በሰማይ
የለህም እኩያ (፫x) ኦ ሃሌሉያ (፪x)
ምንጭ፦ ግጥሙ በ WikiMezmur ማኅበረሰብ የተገለበጠ ነው። የግጥሙ መብት የደራሲው ነው — የመብት ጥያቄ